Zue Sujet und Zeedel 2022

Ab in d Hoose

isch unser Sujet an dr Faasnacht 2022. Gmaint sin d Schwingerhoose, wo au s wichtigschte Erkennigsmergmool vo unserem Goschdyym sin. S goot also ums Schwinge. Dä Sport, wo scho lengscht e Nationalsport isch. Er findet zuenämend Beachtig in dr breite Bevelkerig, wird meischtens mit positive Wärtvorstellige verbunde und wird in dr Regel als fair woorgno.

Zem Schwinge gheere Schwüng resp. Griff. Einigi vo de bekannte Schwüng kemme au in unserem Zeedel vor. Es sin das folgendi:

Hüfter

Isch ein vo de spektakuläre Schwüng. Dr Geegner wird ibers eigeni Hinterteil uff e Rugge drait. Mer winsche gueti Landig.

Fuessstich

Es wird e Draiig adyscht und dr Geegner iber dr Fuess abdrillt. Alles Dyschig, aber wirgsam.

Hochschwung

Do wird dr Geegner in d Luft glipft und ummedrillt. Und denn? Happy landing winsche miir.

Brienzer

Dä Schwung gits vor- und ruggwärts. E Griff iber d Schultere und s Bai bim Geegner iihängge. Was denn bassiert, wenns denn bassiert…

Wyyberhoogge

Isch nit numme fir Fraue. Dr Geegner wird mit em Gnei fixiert und miteme Hoogge gleggt. Do duet aims stoo doch irgendwie vergoo.

Schlungg

Mit emene Rugg wird dr Geegner gege hinde zooge. Wenns schief goot, kunnt me sälber drunter. Also uffbasse!

Gryzgriff

E Schwung fir die Kräftige. Dr Geegner wird ins hooli Gryz brocht und abedruggt. E Gruess an Rugge!

Grittelen

Isch e Bitz speziell. Dr Geegner wird kurz uff e Kopf gstellt und ummedrillt. Dä weiss denn nimme, wo obe oder unde isch.

Bur

Do sin si scho am Bode. Dr Geegner wird am Gurt fixiert und uff e Boode druggt. Wär het dr lengeri Schnuuf?

Kurz

Ein vo de hiffigste Schwüng. Dr Geegner wird dure Dräiig uffe Rugge gleggt. Und aus die Maus.

Gamme(n)

Dr Aagryffer hooggt mit em Bai an däm vom Geegner yy. Mit Vorwärtsdrugg wird dr Geegner denn us em Glychgwicht brocht. Und wenn er fallt…autsch.

Issere Hoogge

Dr Aagryffer länggt iber dr Rugge, stellt si Fuess hinter s rächti Bai vom Geegner, hebt en am Oberarm fescht und drait nach links ab. Und wenns verhebbt, denn stiibbts im Säägmääl.

Basler ruggwärts

Isch ganz nei im Sortimänt. Speziell an däm isch, dass ein ooni Zuetue vom Geegner sälber uff e Ranze fliegt. Macht in dr Seel wee